John 18
Judas nihiꞋamba Jisas amam naumbih
(Mt 26:47-56; Mk 14:43-50; Lu 22:47-53)
1Jisas nandaꞋ beten nahaliꞋ Ahalomana eaꞋ, naloma alupufai ananifai wafeꞋ owala wambo walemb Kidron fisana lawah hiami oliv motawama. NaoꞋwafa wafeꞋ anama. 2Anan Judas nogawa anama ma atuwasi neafeꞋ nihiꞋamba amam naumbih ma Jisas napoma. DeiꞋ main? Nimeguf hiami Jisas naoꞋwafa wape etifigin wapoma anama. 3EaꞋ Judas nafiꞋi naoꞋwa anom soldia maloma anom polisman. Soldia amama maloma polisman amama, amam pris dambami maloma amam Farisi masapaꞋam mafiꞋi. Amam polisman maloma soldia mefaꞋ bagah nagwahis lamifah maloma amama sapaꞋami mefaꞋam mafiꞋi anama.4EaꞋ Jisas nogawa amamaga hiami atuwasi meatagamanai. EaꞋ nafeꞋ nahaliꞋam naꞋi, “IpeꞋ pagolopa emi?”
5EaꞋ magwamana basef maꞋipana maꞋi, “Jisas Nasaretinai.”
EaꞋ Jisas naꞋi, “AeꞋ maꞋuwi.”
EaꞋ Judas naꞋi nihiꞋambamam Jisas, anan naitu nalomam wapotiꞋ. 6EaꞋ Jisas ataꞋ naꞋipam etin naꞋi, “AeꞋ maꞋuwi”, eaꞋ mandahagas mowa motawa etap.
7EaꞋ Jisas nahaliꞋam wapotiꞋ naꞋi, “IpeꞋ pagolopa emi?”
EaꞋ maꞋi, “Jisas Nasaretinai.”
8EaꞋ Jisas naꞋi, “DokoꞋ aeꞋ aꞋipipa aꞋi aeꞋ eaꞋ maꞋuwi. IꞋi ipeꞋ pegolopa aeꞋ, pihapili pekwaha amam mefeꞋ wafifim.”
9EaꞋ Jisas deiꞋ naꞋipam naꞋama naila basef amama fowaꞋ naꞋiami ma motaga alihim endilisi. Basef amama maꞋi naꞋama maꞋi, “Amam amama fowaꞋ ineꞋ nasiꞋiami, ina anona atotona higililana, owaꞋ.”
10EaꞋ Saimon Pita nahapila anona bainat nagianai naha anona aman Malkus nandaꞋmana maola pris dembinai nape naliꞋma pris hiami. EaꞋ natopaꞋ aliga daꞋisinai ananinai nowa.
11EaꞋ Jisas naꞋipa Pita mehip naꞋi, “IneꞋ tanima la bainat nowala let. AeꞋ eaꞋ embela kap Ahalome nasiꞋianai.”
Amam maoꞋwa Jisas nafeꞋma pris dembinai Anas
12EaꞋ amam soldia maloma dembinai amamunai maloma amam polisman Judai hiami mombaloꞋ Jisas mandaꞋ mandof mowaꞋ lagofana. 13EaꞋ maoꞋwana naliꞋ nafeꞋ ma Anas, Kaiafas fafomana. Afagel anama Kaiafas dembinai pris nape naliꞋma pris hiami. 14Aman anama Kaiafas naliꞋ naꞋipa amam agufumi Juda naꞋi, “IꞋi aman atotona nogaꞋ ma nigiambama apeꞋ Juda hiapai, waf anama andeandeꞋ, waf buꞋunai.”Pita nambahoꞋ agel Jisasi naꞋi, “AeꞋ ina egawa Jisas”
(Mt 26:69-70; Mk 14:66-68; Lu 22:55-57)
15EaꞋ Saimon Pita naloma aeꞋ alupuwei Jisasi wagiꞋma Jisas wafiꞋi. Pris anama dembinai nogawa aeꞋ. EaꞋ aeꞋ awis aloma Jisas ipat nomon 16eaꞋ Pita tol naitu uta endalelemb andeꞋ. AeꞋ etanima awisi andeꞋ aꞋipa anoꞋw nemataꞋw kumafi utai eaꞋ aoꞋwa Pita wawis nomon. 17EaꞋ nemataꞋw kumafi utai kwaꞋipa Pita kwaꞋi, “IneꞋ wapotiꞋ alupinai aman anama, o owaꞋ?”EaꞋ anan nagwamaꞋwa basef naꞋi, “AeꞋ owaꞋ.”
18Amam mandaꞋ maola pris anama dembinai maloma anom polisman amam hiami nomanamb mam makata nif maitumam mahiꞋam. EaꞋ Pita wapotiꞋ nalomam naitumam.
Pris dembinai nape naliꞋma pris hiami nahaliꞋ Jisas
(Mt 26:59-66; Mk 14:55-64; Lu 22:66-71)
19EaꞋ pris anama dembinai Anas nahaliꞋ Jisas ipat nomon. NahaliꞋana ma alupumi ananimi maloma basef anan nawalipasami.20EaꞋ Jisas nagwamana naꞋi, “AeꞋ awalipasa basef aeꞋami alihiguma ma epes hiesi etapasi. AeꞋ awalipas nomon ifagw esis Juda saꞋi basef sapeimi nimeguf hiami laꞋelaꞋef. EaꞋ awalipas ipat luꞋunai Godi wapotiꞋ, ipat anama esis Juda hiesi sandakolas etifigin. Basef aeꞋ aꞋiami ina mandambahoꞋ, owaꞋ. 21DeiꞋ maina ineꞋ nahaliꞋ aeꞋ? DeiꞋ nihaliꞋ esis sameꞋ basef awalipasami. Esis sogawam.”
22Jisas naꞋi basef amama, anona polisman naitu felefeleꞋ nakola aombana naꞋipa Jisas mehip naꞋi, “IneꞋ owaꞋ negwamana basef amama dembinai pris.”
23EaꞋ Jisas nagwamana basef naꞋi, “IꞋi aeꞋ iꞋi anom basef awami, ineꞋ niꞋipa amam hiami naꞋama. OwaꞋetin. AeꞋ aꞋi basef endilisimi deiꞋ nahe ma main?”
24Mandelef ataꞋ mapomana lagof Jisasi eaꞋ Anas nasapaꞋana nafeꞋma pris anama dembinai Kaiafas.
Pita nambahoꞋ agel Jisasi wapotiꞋ naꞋi, “AeꞋ ina egawa Jisas, owaꞋ.”
(Mt 26:71-75; Mk 14:69-72; Lu 22:58-62)
25Saimon Pita tol naituma nif mahiꞋana, esis saꞋipana saꞋi, “AꞋi ineꞋ alupinai ananinai?”EaꞋ anan naꞋi, “AeꞋ owaꞋ.”
26EaꞋ anona aman nape felefeleꞋma Pita, anan nandaꞋ maola pris anama dembinai. Anan amam atom wambota atona aman anama doꞋok Pita nahana natopaꞋ aliganai.
EaꞋ naꞋipa Pita naꞋi, “Endilisi, aeꞋ ati ineꞋ nape naloma Jisas ganima lawah oliv motawama.”
27EaꞋ Pita nambahoꞋ agel Jisasi naꞋi wapotiꞋ naꞋi, “AeꞋ owaꞋ.”
Anan ataꞋ naꞋi etin, awata nandaꞋam.
Amam mofaꞋ Jisas mafeꞋma gavman dembinai Pailat
(Mt 27:1-2, 11-14; Mk 15:1-5; Lu 23:1-5)
28EaꞋ kuhimbita atona amam Juda mofaꞋ Jisas makwaha ipat Kaiafasi, mofaꞋana mafeꞋ ipat gavman dembinai. EaꞋ amam Juda ina mafeꞋ mawis ipat anama Romi, owaꞋ. Amam maꞋi, “NaꞋama mofaꞋ alogw awami eaꞋ ina naman meaꞋ gwaꞋaimi luꞋwami Pasova, owaꞋ.”29Amam ukup mandandaꞋ naꞋama eaꞋ maitu andeꞋ eaꞋ Pailat nafiꞋmai amam naꞋi, “Aman anama ipeꞋ paꞋi pendaꞋmana kot ma main?”
30Amam magwamana basef maꞋi, “IꞋi aman anama owaꞋ nondaꞋ waf aonai, apeꞋ ina mofaꞋana nifiꞋmai ineꞋ, owaꞋ.”
31EaꞋ Pailat naꞋipam naꞋi, “IpeꞋ etipa pefaꞋana pendaꞋmana basef mondahama miꞋuli ipeꞋinai. AeꞋ owaꞋ, andaiwaꞋ.”
EaꞋ amam Juda magwamana maꞋi, “MiꞋuli ipeꞋ Romi naꞋi owaꞋ ma moha enin epen nogaꞋ, owaꞋ.”
32Amamaga amama amam Juda mandaꞋami ina mataga etin, owaꞋ. Amama mataga maila basef amama Jisas naliꞋ naꞋiami motaga endilisi. DeiꞋ main? Anan naliꞋ naꞋi, “Nambimb esis sehe egaꞋ lawag usiꞋinai tuꞋwanainai.”
33EaꞋ gavman dembinai Pailat natanima nawis ipat luꞋunai gavmani nomon. EaꞋ nofala Jisas nafiꞋi nahaliꞋana naꞋi, “IneꞋ king dembinai esis Judai?”
34EaꞋ Jisas nahaliꞋana naꞋi, “Basef amama mataga okom ineꞋinai atona o enis epes saꞋipinama aeꞋ?”
35EaꞋ Pailat nagwamana basef naꞋi, “IneꞋ okom naꞋi aeꞋ wapotiꞋ aeꞋ Judaiwei? OwaꞋ. Epes ineꞋisi saloma amam pris dambami, esis etis sombaloꞋena sowaꞋena nafiꞋmai aeꞋ. IneꞋ nandaꞋ maina waf?”
36EaꞋ Jisas naꞋi, “AeꞋ ina Judaiwei king imafi epes etapesi, owaꞋ. IꞋi aeꞋ epe king etap anaeꞋ, alupumi aeꞋami mandaꞋ opeh aeꞋami migiambama aeꞋ mopaꞋ ma esis Juda ina laꞋifisa sombaleꞋe. OwaꞋ.”
37EaꞋ Pailat naꞋi, “NaꞋama ineꞋ enina king dembinai?”
EaꞋ Jisas nagwamana basef naꞋi, “IneꞋ naꞋi aeꞋ anowe dembiwei king. Basef amama endilisimi. MamaꞋwe kolae ma epe king dembiwei. AeꞋ afiꞋi etap anaeꞋ ma iwalipasa basef endilisimi. Emi egafis sondaꞋ waf endilisinai, esis semeꞋ basef aeꞋami.”
38EaꞋ Pailat nahaliꞋana naꞋi, “Basef amama endilisimi, maim basef?”
Pailat naꞋi esis sunda Jisas lawag usiꞋinai tuꞋwanainai
(Mt 27:15-31; Mk 15:6-20; Lu 23:13-25)
Pailat naꞋiam naꞋama eaꞋ notanima nawis andeꞋ esis Juda sapoma naꞋipas naꞋi, “AeꞋ ina ati anom amamaga awami ma anan, owaꞋ. Ina ati anona waf aonai ma eandaꞋmana basef, owaꞋ. 39EaꞋ waf ipeꞋ Judai, ma pandaꞋ gwaꞋaimi luꞋwami Pasova, aeꞋ akwaha enin epen nandaꞋ kalabusi nafeꞋmago ipeꞋ. DeiꞋ ipeꞋ paꞋi aeꞋ ekwaha king Dembinai ipeꞋ Judai nefeꞋmago ipeꞋ, o emi?”40EaꞋ esis sagwamana basef laꞋifimi saꞋi, “OwaꞋetin, anan owaꞋ. IneꞋ nekwaha Barabas nifiꞋmai apeꞋ.”
Aman anama Barabas anan nakowalefi naha epes sagaꞋi.
Copyright information for
AOJFILIFITA